ឯកឧត្តម ស៊ុន សុវណ្ណារិទ្ធ អភិបាល នៃគណៈអភិបាលខេត្តកំពង់ឆ្នាំង បានអញ្ជើញជាអធិបតីភាព ក្នុងពិធីចែកប័ណ្ណកម្មសិទ្ធិ ជូនប្រជាពលរដ្ឋ ១៣៩៤ ប័ណ្ណ ស្មើនឹង ៤៤៨ គ្រួសារ នៅភូមិកន្សែង និងភូមិពពេល ឃុំខុនរ៉ង

(ខេត្តកំពង់ឆ្នាំង)៖ នៅព្រឹកថ្ងៃចន្ទ ១១កើត ខែភទ្របទ ឆ្នាំថោះ បញ្ចស័ក ព.ស. ២៥៦៧ ត្រូវនឹង ថ្ងៃទី២៥ ខែកញ្ញា ឆ្នាំ២០២៣នេះ ឯកឧត្តម ស៊ុន សុវណ្ណារិទ្ធ អភិបាល នៃគណៈអភិបាលខេត្តកំពង់ឆ្នាំង បានអញ្ជើញជាអធិបតីភាព ក្នុងពិធីចែកប័ណ្ណកម្មសិទ្ធិ ជូនប្រជាពលរដ្ឋ ១៣៩៤ ប័ណ្ណ ស្មើនឹង ៤៤៨ គ្រួសារ នៅភូមិកន្សែង និងភូមិពពេល ឃុំខុនរ៉ង ស្រុកបរិបូណ៌ ដោយមានការអញ្ជើញចូលរួមពីលោក សាន់ យូ អភិបាលរងខេត្ត លោក លី សុភា ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត ថ្នាក់ដឹកនាំមន្ទីរអង្គភាព លោក ចេង ចាន់ដូណា អភិបាលស្រុកបរិបូណ៌ និងប្រជាពលរដ្ឋ។

លោក លី សុភា ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត បានបញ្ជាក់ថា ភូមិឃុំនេះ កន្លងមក មិនអាចចេញប័ណ្ណកម្មសិទ្ធិបានទេ ដោយសារជាប់ក្នុងសារាចរណែនាំលេខ ០២ និងស្ថិតក្នុងតំបន់ ២ នៃបឹងទន្លេសាប តែដោយមានការសម្រេចកែសម្រួលព្រំប្រទល់ ពីតំបន់២ មកជាតំបន់១ និងលុបសារាចរខាងលើ ទើបចុះបញ្ជី និងចេញប័ណ្ណកម្មសិទ្ធិជូនប្រជាពលរដ្ឋបាន។

ក្នុងឱកាសនោះផងដែរ ឯកឧត្តម ស៊ុន សុវណ្ណារិទ្ធ អភិបាល នៃគណៈអភិបាលខេត្តកំពង់ឆ្នាំង បានពាំនាំនូវការសាកសួរសុខទុក្ខ និងនឹករលឹកពីសំណាក់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដែលបានកំពុងបំពេញបេសកកម្មនៅក្រៅប្រទេស និងសូមថ្លែងនូវអំណរអរគុណជូនចំពោះប្រជាពលរដ្ឋទាំងអស់ ដែលបានចូលរួមយ៉ាងសកម្មជាមួយរាជរដ្ឋាភិបាលនាពេលកន្លងមក៕