(កំពង់ឆ្នាំង)៖សត្វគោ៧ក្បាលបានងាប់និង១ ក្បាលរបួស ធ្ងន់បាក់ជើងក្រោយទាំង២ដោយ សាររថយន្តធុនធំ១គ្រឿង បានបុកកិនពីលើពេញទំហឹង។ ហេតុការនេះបានកើតឡើងនៅវេលាម៉ោង៨៖១៥នាទីព្រឹកថ្ងៃទី៣ ខែកញ្ញា ឆ្នាំ ២០២២ លើផ្លូវជាតិលេខ៥ចំណុចមុខក្លោងទ្វារចូលវត្តធម្មវ័ន ក្នុងភូមិត្រពាំងអញ្ចាញ ឃុំក្រាំងដីមាស ស្រុករលាប្អៀរ ខេត្តកំពង់ឆ្នាំង។
សមត្ថកិច្ចនគរបាលចរាចរណ៍ស្រុករលាប្អៀរ នៅកន្លែងកើតហេតុបានឲ្យដឹងថា រថយន្តបង្កខាងលើនេះម៉ាកហ៊ីយ៉ាន់ដាយភ្លៅ៥ ពាក់ស្លាកលេខភ្នំពេញ 3C-0474 បើកបរក្នុងទិសដៅពីត្បូងទៅជើងក្នុងល្បឿនលឿនមកដល់ចំណុចកើតហេតុក៏បានបុកហ្វូងគោមួយហ្វូងដែលកំពុងឆ្លងកាត់ផ្លូវ បណ្ដាលឱ្យគោ៧ក្បាលបានងាប់នៅកន្លែងកើតហេតុ និង១ក្បាលទៀតរបួសធ្ងន់បាក់ជើងក្រោយទាំង២។
ក្រោយពេលកើតហេតុសមត្ថកិច្ចបានឃាត់ខ្លួនអ្នកបើកបររថយន្តដែលបានបង្កគ្រោះថ្នាក់ខាងលើនេះយកមកកាន់អធិការដ្ឋាននគរបាលស្រុករលាប្អៀរ ដើម្បីកសាងសំណុំរឿងចាត់ការតាមនីតិវិធី។ ដោយឡែកនៅកន្លែងកើតហេតុសមត្ថកិច្ចបានសម្រួលចរាចរណ៍ និងធ្វើកំណត់ ហេតុប្រគល់សត្វគោដែលងាប់នឹងរងរបួសជូនប្រជាពលរដ្ឋជាម្ចាស់គោវិញ និងបានណែនាំឲ្យម្ចាស់គោទាំង៣,៤នាក់ដាក់ពាក្យបណ្ដឹងតាមផ្លូវច្បាប់។
ប្រជាពលរដ្ឋនៅកន្លែងកើតហេតុបានបញ្ជាក់ឲ្យ ដឹងថា:មុនពេលកើតហេតុពួកគាត់២នាក់បានកាន់ទង់ក្រហមគ្រវីជាសញ្ញាសុំឲ្យរថយន្តបើកបរលើផ្លូវជាតិបន្ថយល្បឿនឬឈប់សុំឲ្យគោឆ្លងកាត់សិន។ ប៉ុន្តែក្នុងពេលនោះរថយន្តបង្កហេតុខាងលើមិនបានបង្អង់ល្បឿន ឬឈប់នោះទេគឺបានបើកក្នុងល្បឿនលឿនវ៉ារថយន្តតូច១គ្រឿងនៅពីមុខ ហើយក៏បានបុកហ្វូងគោដែលកំពុងឆ្លងផ្លូវជាតិបណ្ដាល ឲ្យមានគ្រោះថ្នាក់តែម្ដង ក្នុងហេតុការណ៍ខាងលើនេះគឺគោ៣ក្បាលបានងាប់នៅក្រោមកង់រថយន្តខាងមុខ និង៤ក្បាលទៀតបានងាប់នៅក្រោមរថយន្តផ្នែកខាងក្រោយ ២ក្បាលទៀតរបួសបាក់ជើងក្រោយទាំង២។
ករណីខាងលើនេះប្រជាពលរដ្ឋសំណូមពរដល់មន្ទីរសាធារណៈការខេត្ត សុំមេត្តាដាក់ផ្លាកសញ្ញាគោឆ្លងកាត់ផ្លូវត្រង់ចំណុចខាងលើនេះឡើងវិញផង ព្រោះថាពីមុននៅចំណុចនេះមានផ្លាកសញ្ញាគោឆ្លងផ្លូវចំនួន២ផ្ទាំង ប៉ុន្តែថ្មីៗនេះត្រូវបានគេដកចេញពេលជួសជុលផ្លូវជាតិ។ការដាក់ផ្លាកស ញ្ញានេះឡើងវិញ ដើម្បីជាដំណឹងដល់អ្នកបើកបរយានយន្តគ្រប់ប្រភេទសុំឲ្យប្រុងប្រយ័ត្ននិងបន្ថយល្បឿន កន្លែងសត្វគោឆ្លងកាត់ ដើម្បីចៀសវាងកើតមានគ្រោះថ្នាក់ជាយថាហេតុ នៅពេលក្រោយទៀត៕